Монгол Улсын Хөдөлмөрийн баатар, Ардын зураач, Төрийн соёрхолт, Урлагийн гавьяат зүтгэлтэн Ням-Осорын Цүлтэм нь дүрслэх урлагийн олон арван сор бүтээлийг туурвисан уран бүтээлч төдийгүй, “Монголын дүрслэх урлагийн тойм” судалгаагаар дэд докторын зэрэг хамгаалсан урлаг судлалын ухааны анхны эрдэмтэн юм. Тэрээр амьдралынхаа жар гаруй жилийг монголын дүрслэх урлагийн салбарын хөгжилд зориулж, Монголын Урчуудын Эвлэлийг гуч гаруй жил удирдаж, Г.Занабазарын нэрэмжит Дүрслэх урлагийн музей, Дүрслэх урлагийн дунд сургуулийг бие даасан сургууль болгоход үнэлж баршгүй хувь нэмрээ оруулсан гавьяатан билээ.

Эрхэм хүндтэй уран бүтээлчийнхээ 100 жилийн ойг тохиолдуулан Г.Занабазарын нэрэмжит Дүрслэх урлагийн музей, үр хүүхдүүдтэй нь хамтран түүний амьдрал, уран бүтээлийн түүхэн гэрэл зургийн үзэсгэлэнг олны хүртээл болголоо. Тус үзэсгэлэнд Н.Цүлтэм гуайн амьдралын түүхийг өгүүлсэн нийт 100 гэрэл зураг дэлгэгдсэнээс гадна зураачийн амьд ахуйдаа хэрэглэж байсан зургийн хэрэгсэл, эд зүйлсээс дэлгэн үзүүллээ.